Leef luuj va Bèngelder,
Ich bin Coen Cremers, doeër mien vrunj ooch waal “Crieëm” geneumd, en noe dus Prins Coen I van CV De Keescheknup. Ichzelf hei eigenlik noëjts miër gedach dat ich dit oëjt nog zou mooge zikke. Wat een geweldig ieër! Same mit mien jeugdprinses Jolijn gaon ich d’r alles aan doon om d’r wear inne onvergaetelijke vastelaovend in Bèngelder van te make.
Ich wil uch gear op twieë maneere kort get uver michzelf vertille;
- Leavesloop
Gebaore bin ich in ’t ziekenhoeës va Broenssem op 2 augustus 1992. Getaoge bin ich aan de Mestreechterweag 2 in Bèngelder. Hie höb ich lange tied mit pap, mam (en later Asta) en mien breurke Luc, dae prins is geweas in 2019, gewoeënd.
Nao de basissjoeël höb ich de HAVO gedaon op ’t Trevianum in Zitterd. Vanaaf dat moment zou oog veul van sociale laeve zich dao aafsjpele. Es de luuj mich vreuger vroogte; wat wilse later weare? Dan zei ich: ‘profvoetballer’! Op de trainingsvelden van VV Jaobik (wo ich bin begoosj mit voetballe, onger leiding van Tim Engelen), RKDFC, VV Puth, DVO (en later Wijnandia) bleek echter al sjnel duudelijk, dat ’t dat neet ging waere. Ich bin daorom SPECO Sportmarketing gaon sjtudere in Tilburg om toch misjiens dae sjtap (op een anger maneer) te kinne make in de topsport.
Vanaaf dat moment lieërde ich mien toenmalige vriendin oet Wienesrao kinne en höbbe we samen (op bienao 12 jaor tied) in Mestreech, Brach en Lömmerich gewoond. Veur de vastelaovend keem ich dan ooch altied geer truuk nao ’t dörp om herinneringe op te haole, bie te kalle en plezeer te make mit de luuj va Bèngelder. En natuurlijk om dae ieësjte prieës in de optoch binne te haole!
Oeteindelik zin v’r 1,5 jaor geleije oet elkaar gegange en höb ich mich weer bie pap en Asta thoeës laote insjrieve. ’T vinge van een fijn hoeës, alleen, is tegeweurdig neet eave mekkelik dus woon ich dao officieel nog ummer. Ich hei mich veurgenomme dat ze lang meugelijk aan te houwte, totdat Leon en No aan de deur zouwe sjtaon, haha. Gelukkig head dat neet lang gedoeërd en is miene dreum, om oëjt Prins va Bèngelder te weare alsnog in vervulling kinne gaon. Tsjah, wie ’t laeve kint lopen hè… In de praktijk bin ich uverigens väöl bie miene paetenonk Paul Smeets in Doonder te vinge.
Wie ich eenmaol mien bachelor-diploma in de tesj hei, bin ich via-via gaon wirke bie ene technische dienstverlener in Remunj. Neet ech mien dink mer de sjpeuling, in banen in de sjport, is in Limburg dun. Ich wou kos-wat-kos neet verhoeze nao de Randsjtad, dus mien geduld wearde op de proof gesjtild. Nao vief jaor keem oeteindelijk de kans om bie ’t sportkleiermerk Masita te gaon wirke es marketing manager. In dea tied höb ich veul kontakte wete te likke mit de voetbalclubs in Limburg dat oeteindelik d’r toe head geleid dat ich noe een kleine twieë jaor bie Fortuna wirk es manager MVO (maatsjappelik verantwoord ongernumme). Ich bin dao verantweurdelijk veur alle maatsjappelike projecten in de regio zo es ’t bevordere van een actieve en gezonde leefstijl op basissjoele, verzurge van clinics bie amateurclubs, ‘n uitje veur dementerende ouderen realisere, participatietrajecte veur luuj mit een achtersjtand op de arbeidsmarkt opzitte en gank zo mer doer. Een geweldige, mer drukke, baan wo ich erg content mit bin!
- Mien medaille
Mien medaille en pin höb ich gemaak mit allerlei elemente die mich omsjrieve wea ich bin, wo ich van houwt, wat ich sjiek ving en wo ich greutsj op bin. Zuut geer oog de 9 verschillende elemente die d’r in zin verwirkt?
- De heurens en de sik van inne geitebok; de geitebok (Hennes IX) is de officiële mascotte va mien favoriete voetbalclub 1. FC Köln. Neet alleen de club, mer oog de sjtad en meziek sjpreake mich zeer aan.
- Ene boom mit inne bal d’r onger; dat is ’t logo va Woander Forest. De voetbalclub wo ich actief bin op ’t ieësjte elftal.
- Ene fietshelm; naeve voetballe is wielrenne inne groeëte hobby van mich.
- De erm mit een glaas bear; jao, dat drink ich oog gear. Mer dit is een deel oet ’t logo van Rowwen Heze. Een band wo gans Limburg greutsj op kin zeen.
- Twee keesche; een ode aan ’t Keescheriek moog natuurlik zeker neet ontbreake.
- 2024, mit een rood accent veur de ‘2’-en; Ich bin gebaore op 2 augustus en mien paetekiendje Lhoé op 2 december. Verdere oetlik liekt mich uverbodig!
- Veutsjtepkes en ‘500 Miles’; 500 Miles is de naam van ozze vrunjegroep dea is ontsjtange in een pub in Liverpool wo v’r volmondig ’t nummer I’m Gonna Be van De Proclaimers deege mit bleare. Vanaaf dat moment is dit nummer typerend veur ozze groep.
- Prinsesjteak; dea mooch ich ’t kommende jaor mit hieël veul trots dragen.
- En tot sjlot, de tekst ‘Vergaet neet te laeve’; ’n fantastisch nummer, mit fantastische tekst dat ich ooch geer aan alle luuj van Bèngelder en Beekdaelen wil mitgeave; ‘Vergaet neet te laeve, vergaet neet te lache en maak dat venoavend de daag wurd gepluk!
