Leef luuj van Bèngelder,
Eindelik is ut dan zo wieët…… In 2023 moog ich als prins Patrick II van CV de Keescheknup same mit mien prinses Vivian en miene adjudant No euver ut Keescheriek gaon regere.
Ich sjtil mich geer aan uch veur zodat geer wit achter wea dat geer aan loopt in de polonais mit de Vastelaovend.
Ich bin 48 jaor oud en woën same met prinses Vivian aan de Eindsjtroat 8 in Bèngelder en hub 2 dochters Maud (17) en Isa (15).
Mit oetzundering van een kort oetsjtepke van ongeviër 2 jaor nao Zitterd, hub ich mien ganse leave in Bèngelder gewoënd. Iësj aan de Putsjtroat 8 en noe dus aan de Eindsjtroat 8. Ich veul mich dan ooch unne echte Bèngelder jong.
Wirke doon ich bie Avient Protective Materials in Heèle (vuurheen DSM Dyneema) woa ich mich bezig hout mit de produk kwaliteit en ut ongersjteune van de continue verbeater cultuur als site facilitator.
Doa neave bin ich, af en toe, un bietje inne wanjelende reklamezuul veur Alfa beer, woabie Alfa es ‘hofleveranceer’ van ut allerlekkerste pils natuurlik neet moog ontbreake in ut hoes van dizze prins.
Mien hobbies zint onger angere voetballe bie de veterane van VV Joabik, woabie mien sjterkste punt toch miëstal de 3e helft is.
Ooch probeer ich muziek te make en bin ich al sinds 1997 lid van Zaate Hermenie ’t Kumpt oet Bèngelder. Oëit begos op trompet, doanoa un paar jeurkes op de tuba gesjpieëld en noe probeer ich alweer gans get jeurkes get van muziek oet mien sjuuf te kriege.
Tot sjlot hub ich nog inne hobbie dae zich ut beste leet omsjrieve als ‘genete van ut laeve en ut make van sjpas en plezeer!’ En dat is precies wat ich same mit alle carnavaliste oet Bèngelder en omgeaving wil gaon doon als prins van CV de Keescheknup, same mit mien prinses Vivian en miene adjudant No.
Ich hoop uch dan ooch allemoal te moge verwelkomme bie de activiteite van CV de Keescheknup.
Same gaon veer d’r inne geweldige Vasteloavend van make!!
Alaaf!
Prins Patrick II